An Dauki Sabbin Ma’aikatan kula da Majinyata 416 a jihar Yobe.
Daga Hassan Ahmed Maibaru.
Gwamnan Jihar Yobe, Dr. Mai Mala Buni, ya amince da daukar ma’aikata kai tsaye ga dalibai 416 da suka kammala karatu daga Kwalejin Koyon Aikin Jinya ta Shehu Sule da ke Damaturu.
Sabbin ma’aikatan sun hada da masu kula da majinyata 158, ungozoma na asali 196, da kuma daliban da suka samu takardar shaidar HND a fannin jinya guda 62.
Gwamnan ya bayyana hakan ne a jawabin da ya gabatar yayin bikin yaye daliban jinya da ungozoma da aka gudanar a harabar kwalejin da ke cikin garin Damaturu, inda mataimakinsa, Idi Barde
Gubana, ya wakilce shi.
Ya ce zuba jari da gwamnati ke yi a wannan cibiyar na da nufin samar da isassun ma’aikatan lafiya a cibiyoyin kiwon lafiya dake fadin jihar, yana mai cewa gyare-gyaren da aka fara a bangaren lafiya ya fara haifar da sakamako mafi inganci a bangaren kiwon lafiya.
Gwamnan ya kara da cewa zuba jarin da aka yi a kwalejin cikin shekaru bakwai da suka gabata ya kasance mai amfani kuma mai tasiri ga al’ummar jihar.
Ya kuma bayyana cewa gwamnatin jihar ta dauki ma’aikatan lafiya sama da 3,500 a ‘yan shekarun nan, ciki har da wadanda suka kammala daga wannan kwaleji.
Ya jaddada cewa gwamnatinsa ta mayar da hankali wajen inganta bangaren lafiya domin tabbatar da samar da ingantattun ayyukan kiwon lafiya ga al’umma.
Haka kuma, ya bayyana cewa gwamnati ta kafa cibiyar bincike da horaswa ta zamani kan harkokin lafiya (BioRTC) a Jami’ar Jihar, domin bunkasa bincike da horar da matasa masana kimiyya.
Gwamnan ya tabbatar wa da shugabannin kwalejin cewa gwamnati za ta duba dukkan bukatunsu tare da ci gaba da tallafawa cibiyar domin ta zama daya daga cikin manyan cibiyoyin horas da ma’aikatan lafiya a Najeriya.
Ya kuma yabawa shugabar kwalejin mai barin gado, Hajiya Hadiza Sabo, bisa nasarar kammala wa’adinta biyu tare da kafa ingantattun matakan kwarewa a harkar ilimi.
A nasa bangaren, Kwamishinan kiwon Lafiya, Mohammed Lawan Gana, ya bayyana cewa Jihar Yobe ta zama jiha dake kan gaba wajen samar da ayyukan kiwon lafiya na matakin farko a Najeriya, bisa wani bincike mai zaman kansa, ida aka gudanar inda ta samu kyautar dala miliyan 1.2.
Tun da farko, shugabar kwalejin, Hajiya Hadiza Sabo, ta ce daga shekarar 2019 zuwa 2026, kwalejin ta yaye dalibai 1,485, dukkansu kuma sun samu aiki kai tsaye bayan kammala karatu, lamarin da ya taimaka wajen inganta daukar aiki da rike ma’aikatan lafiya a jihar.
Wani abin dayafi daukar hankali a wajen bikin ya kunshi kaddamar da wasu ayyuka, da kaddamar da mujallar da ke nuna nasarorin gwamnati, tare da yaye dalibai ciki har da rukuni na farko na masu HND a fannin jinya.
Gwamnatin jihar ta sayi kwafi 10 na mujallar kan kudi Naira miliyan 10, yayin da babban mai kaddamarwa, Liman Machina Dabuwa na kamfanin Damuli Investment, ya sayi kwafi biyar kan Naira miliyan 1, tare da sauran gudummawar da aka bayar.